Кошарка Продолжува триумфалната низа на кошаркарите
Македонската кошаркарска селекција до 18 години ја совлада Словачка со 83:58 и ја продолжи триумфалната низа на Европското првенство Б дивизија што се одржува во Романија.
Со оваа победа избраниците на селекторот Тони Симиќ го потврдија првото место во групата, а низата на успешни резултати може да ја продолжат и во последното коло против Данска и во четврт-финалето да влезат со максимален учинок.
Клучен дел од мечот беше вториот период во кој дефинитивно го скршивме отпорот на Словаците и на полувреме заминавме со водство од 42:30.
Во продолжението од натпреварот повторно игравме во голем стил и во пресрет на завршната четвртина имавме сигурна предност од 64:42.
Во завршните десет минути нашите кошаркари го одржуваа водството и на крајот стигнавме до убедлив триумф од 83:58.
На теренот во текот на мечот се појавија сите играчи и од 12 колку што се во записникот во листата на стрелците се запишаа 11.
Најефикасни со по 10 поени беа Дарио Митевски и Андреј Јакимовски, кој додаде 10 скока и пет асистенции.
Во последното кое е на програмата утре македонската репрезентација игра против Данска, а почетокот е закажан за 19 часот и 45 минути.
Во останатите два натпревари од денешното четврто коло Грузија ја совлада Украина со 85:73, а Република Ирска славеше над Данска со 81:60.
