Ракомет Металург атакува на втора победа во СЕХА
Македонскиот вицешампион Металург в недела го пречекува Мешков Брест и тренерот на тимот од Автокоманда, Данило Брестовац верува дека неговите избраници можат да стигнат до вториот триумф во регионалното натпреварување.
“Очекувам добра игра и позитивен резултат. Сметам дека сето тоа што го работиме ќе продолжи во една нагорна линија, во нападот и во одбраната. Сепак, прво треба да видиме со кој состав ќе дојде Мешков, а јас сум убеден дека нема да дојдат со оној најслабиот, со кој одиграа доста средби, туку ќе дојдат засилени. Ние утрово го анализиравме мечот со Вардар, а попладне ќе ја почнеме подготовката за Мешков, кога и ќе знаеме со кој тим доаѓаат во Скопје. Имаме згуснат распоред и кај одредени играчи се почувствува замор, но јас очекувам дека со добра игра ќе стигнеме до победа, па макар и со еден гол разлика. Посакувам малку и ние да се израдуваме. Знаеме за каков тим се работи, знаеме дека се добра екипа, која има резултатска криза, но и дека се клуб со огромен буџет, со многу вложувања, со одличен стручен штаб и со играчки погон од 26-27 врвни играчи, кои се добро платени. Ние ќе мораме да одиграме добро и тимски во сите 60 минути, затоа што нам не ни помагаат еден или двајца поединци, кои би одиграле на високо ниво. Ни требаат многу повеќе играчи да бидат на тоа високо ниво, односно сите да одиграат добро и тимски. Ќе мораме да го дадеме најдоброто во нападот и во одбраната. Да не речам треба да бидеме совршени, но овој тим е конципиран и направен за тимски да го извади мечот до крај”, истакна Брестовац.
Металург в недела во салата на СЦ Јане Сандански ќе го одигра последниот меч пред своите навивачи за оваа година и тоа е дополнителен мотив за ракометарите да се обидат да направат изненадување и да стигнат до нови бодови.
“Ова е нашиот последен натпревар пред домашната публика за оваа година. Кај нас се чувствува замор поради згуснатиот распоред, ама наше е да дадеме сè од себе. Знаеме со какви играчи располага Мешков, но мислам дека ќе можеме да се израдуваме на победа”, изјави Димитар Димитриоски.
Натпреварот во СЦ Јане Сандански в недела почнува од 17 часот и 30 минути.
