Култура „ДЕБАТА ЗА ЕВРОПА“
Во отворена размена на идеи во рамките на тридневниот настан„Дебата за Европа“ кој годинава се одржа во Скопје беа загатнати прашања поврзани со можните влијанија на „Уметноста и културата во времиња на промени“. За Анте Контиус културата на некој начин ја оплеменува политиката и важно е во континуитет се потсетува на тоа.
„Култура без политика е речиси невозможно, потребна ви е рамка и политика без култура е катастрофа. Бидејќи без вклучување на културата, без сензитивноста на уметникот и без околностите во кои се преведуваат литературните дела не би можеле да говориме за културна размена“., кажа Анте Контиус, Фондација С. Фишер за иницијаторите и мрежата ТРАДУКИ.
За жал сведоци сме на бројни примери кои говорат за истиснување на уметноста и културата на маргините на општеството и примери на нивна политизација, во недостиг на конкретна културна политика и стратегија, ќе забележат дел од учесниците во дебатата.
„Тоа не е проблем само во Македонија, туку проблем во целиот свет. Политиката го загуби своето разбирање за уметноста и културата. Ова е мој личен став, но сметам дека би им помогнало на политичарите да имаат контакт со уметничката и културна сцена на својата земја, и со меѓународната се разбира. И мислам дека од тоа можат многу да научат“, кажа Анемари Турк, програмски менаџер на „ДЕБАТА ЗА ЕВРОПА“.
Солидарноста и културниот дијалог е она што му треба на целиот свет, во дадениов момент тоа е особено важно и за Македонија, сметаат учесниците и организаторите на „ДЕБАТА ЗА ЕВРОПА“ во организација на фондацијата Фишер, фондацијата за култура „Алијанц“ и Германската академија за јазик и литература.
Нина Стефанова
