Одржан пијанистички концерт во Кисела Вода за опуштање на граѓаните од притисокот со ширењето на корона вирусот

Паркот „ Шопен“ во Кисела Вода, во кој и клупите се направени како клавијатури, беше подиум каде на пладне настапија повеќе помлади, но веќе докажани репродуктивни уметници- пијанисти. Според Дуња Иванова, која изведе дела од Јан Тирсен и Лудовико Инауди, современи класични композитори, претставниците на минимализмот и пост минимализмот, концертите на отворено се одлична иницијатива, за сограѓаните , макар за миг да заборават на секојдневието, обременото од ширењето на корона вирусот.

Сметам дека ова е една позитивна иницијатива, ако ништо друго, да го оттгне вниманието од целиот набој кој сите не обзема, во последно време. Сметам дека ова е шанса и за уметниците кои во моментов немаат никакви приходи , ете колку- толку да им се помогне и од друга страна, да се исполни медиумскиот простор со убава уметност- Дуња Иванова-пијанистка.

Според пијанистката Емилија Попивода, која изведе преработки на повеќе македонски народни песни, од композиторот Димитрије Бужаровски, во време кога културата е избришана од јавниот простор, овој вид настапи, кои Град Скопје ги организира и пренесува преку нивната Фб страница и Ју Тјуб канал, се можност да се претстави работата на уметниците.

Навистина е непредвидливо што ќе се случува понатаму. И во ова време, ова е вистинско решение , значи виртуелни концерти во живо, на уметниците- Емилија Потевска Попивода-пијанистка.

Адра Мустафаоглу, кој изведе дела од Сати, Шопен, Прокофјев, Фазил и Сај, не ги криеше емоциите дека едвај чека да помине овој бран од пандемијата, за да ги посети најблиските.

Навистина се надевам дека ова ќе заврши што побргу, да можеме сите да се вратиме со огромна љубов да се видиме со сите најблиски- Арда Мустафаоглу-пијанист.

Иако на растојание од изведувачите, не изостана интересот од соседните згради, од љубителите на класичната музика. Во рамките на настапите од програмата „ Култура во време на Корона“, до вечерните часови во Кисела Вода и Аеродром, настапи имаат и групите „Силви Бенд, „ Плутос Даутс“ и „ Саут Парк“. Сите изведувачи од Град Скопје се финансирани со 14500 денари.

Сотир Трајков