Дијалогот меѓу Пикасо и Мице Јанкуловски со две награди на Саемот за уметност во Солун

По гласањето на публиката на Меѓународниот саем за современа уметност во Солун, од вкупно 4 награди кои се доделуваат, 2 отидоа за изложбата „ Неочекуван дијалог меѓу Пикасо и Мице Јанкуловски“. Нашиот сликар , колекционер и директор на галеријата Остен, за црните платна во акрил, од циклусот „ Форма 3“, на кои светлината доловува различни подвижни прикази, ја освои наградата „ Ел Греко“, за најдобар автор.

Со гребењето на платното, на црната боја, како што се движи сонцето, така и ефектот што не сум го правел механички, природата сама го прави, изјави Мице Јанкуловски-награден со „ Ел Греко“ за најдобар автор.

За концептот на изложбата, во која платната на Јанкуловски дијалогизираат со керамиките на Пикасо, дел од колекцијата на галеријата Остен, а дел од друг грчки колекционер, награден е кураторот од Атина, Стефанидис.

Имаме многу силен уметник од Балканот и многу силен уметник од Шпанија. Имаме јукста позиција и исто така врска меѓу нив, изјави Манос Стефанидис-куратор на изложбата.

Јанкуловски за прв пат се претстави на Саемот за современа уметност во Солун, на првото негово издание, во 2016 година.

Ние сѐ почнавме заедно. На почетокот полека. Овој пат погласно, а тритиот пат ќе биде „ бум“. Се надевам, разбирате? Ние мора да се поттикнуваме меѓу себе за да правиме заедно големи проекти, изјави Пантелис Цацис-основач и директор на Саемот за современа уметност во Солун.
Овие претставувања се најдобар пример за она што е наша заложба за културна дипломатија, меѓутоа и за разбивање на стереотипите и затвореноста која што ја имавме, особено во поглед на соседите, рече Роберт Алаѓозовски- национален координатор за култура и меѓуресорска соработка.

Меѓу 38 галерии од Европа, Азија, Америка и Грција, нашата земја на саемот ја претставува и 62 годишниот Центар за современа ликовна уметност од Прилеп. Тие презентираат дела од тројца грчки уметници, меѓу кои е заслужниот за збирката на МСУ- Скопје, по земјотресот, Јанис Гаитис и српскиот автор Зоран Ивановиќ. Саемот за современа уметност во Солун трае од 21 до 24 ноември.

Сотир Трајков