Владата треба да ги достави уставните амандмани до Собранието

Денеска истекува рокот кога Владата треба да ги достави уставните амандмани според Договорот од Преспа до Собранието. Генерално, текстот на нацрт-амандманите на Уставот е усогласен, откако вчера премиерот Зоран Заев се сретна со осумтемина пратеници од новата пратеничка група на ВМРО-ДПМНЕ и коалицијата.

Денеска ќе се знае дали во Преамбулата ќе се спомене и Охридскиот рамковен договор. Бројот на амандманите ќе биде меѓу 4 и 7, но секој пратеник може да поднесе амандмани на амандманите, рече Заев.

Пратеникот Крсто Мукоски рече дека добиле согласност и разбирање од Заев за нивните барања. А тоа се зацврстување на идентитетот, постепена промена на името за внатрешна употреба, следејќи ги преговорите со ЕУ и поништување на сите амандмани кои произлегуваат од договорт во случај Грција да не го ратификува.

Мукоски изјави дека било договорено од понеделник да почне да работи и телото за помирување и ја повика ВМРО-ДПМНЕ да учествува во работата на тоа тело. Еве точно што изјавија Заев и Мукоски по средбата.