Вести Телма сторија: Поштар измамил преку сто граѓани
Злетовци останаа со испразнети сметки и штедни книшки. Бројката на измамени жители секојдневно се зголемува. Според мештаните кои денеска застанаа пред камерата на Телма од нивните сметки и штедни книшки поранешен службеник во Македонска пошта со години наназад успеval да испумпа голема сума на пари, но и да не им ги внесува на книшките. Според проценките на измамените штета се движи и до 200.000 евра. Најголем дел се пензионери, кои како што велат штеделе да не бидат на товар на децата, но и да им помогнат. Вера Стојановска која шест години штедела, сега има само еден денар на книшката.
Скнадалот се открил на почетокот на месецот, кога еден пензионер наместо да ги извади парите од поштата во Злетово, застанал на шалтерот во Штип, но оттаму му рекле дека на сметката нема 5.000 евра, како што тврдел. Поштенскиот службеник бил суспендиран, но откако случајот почнал да се расплетува на 6 јули се самоубил. Мештаните меѓу кои блиски роднини и пријатели му верувале, па и своите штедни книшки ги оставале да ги чува, како што велел во сефот.
Оштетените жители, од кои најголем дел се пензионери потпирајќи се на бастуните секој ден доаѓаат пред поштата за да си ги бараат парите. Штеделе од она што ќе го заработат од земјоделство, но и од рударските пензии.
ОД СВР-Штип потврдуваат дека кај нив постојано пристигнуваат нови пријави на измамени граѓани, а целокупната документација е доставена до Основното јавно обвинителство Штип на нивна понатамошна постапка.Надлежните во Македонска пошта од Штип одговорите на прашањата дали ќе им се вратат парите на оштетените жители на Злетово ни укажаа да ги бараме во централата во Скопје.
Викторија Јованова
