Вести Рекации на политичките партии по приведувањето на Јанева
Политичките партии и Владата се огласија по приведувањето на шефицата на СЈО, Катица Јанева и проширувањето на истрагата во која сега таа е осомничена. Владеачката СДСМ и опозициската ВМРО – ДПМНЕ повторно со дијаметрално спротивни ставови. За едните е доказ за неселективност додека за други обид да се уништат доказите и да се спасат политичари инволвирани во скандалот. Од Владата побараа да се продолжи со темелната и независна истрага додека од Алијанса на Албанците пак со барање да се истражат сите случаи против функционери на ДУИ.
Опозициската ВМРО – ДПМНЕ обвини дека приведувањето на Јанева требало да се случи веднаш по откривањето на скандалот и со тоа се дало време за да се уништат докази. Според опозицијата пресот на Обвинителството не дал одговори на клучните прашања околу инволвираноста на политичари и премиерот Заев во случајот.
Од СДСМ пак, порачаа дека правната држава функционира неселективно за сите и дека никој не е над законите, никој нема да биде амнестиран и сите ќе одговараат за своите постапки. Оттаму нагласија дека очекуваат од Обвинителството да продолжи со длабнинска и независна истрага.
Со став се јавија и од Владата од каде порачаа дека со проширувањето на истрагата врз Јанева се потврдува дека пред правдата и законите, сите се еднакви.Од Владата повикаа на темелна и независна истрага , која мора да заврши што е можно поскоро и да ги покаже сите детали.
Од Алијанса на Албанците позитивно ја оценија работата на Обвинителството и проширувањето на истрагата врз Јанева и истовремено апелираа до надлежните институции до крај да ги истражат сите случаи во кои се инволвирани функционери на ДУИ со што ќе се докаже дека нема селективна правда.
Огнен Чанчаревиќ
