Протест на Институтот за хемија поради лошите услови за работа и студирање

Лошите услови за работа и студирање на Институтот за хемија при Природно – математичкиот факултет со кои се судираат со години, ги натераа професорите и студентите на протест. Велат, се пензионираат професори и лаборанти, а веќе 8 години нема согласност за вработување нов асистент. Не се вложуваат сретства за подобрување на условите за работа и за научноистражувачка дејност. Лошите услови придонеле бројот на вработен кадар да се намали од 58 наставници, асистенти и лаборанти во 2000 година на вкупно 24, денес. Раководителката на Институтот јавно побара од власта да им ги исполни барањата.

Итно одобрување на барањата за вработување на млади соработници од надлежните министерства, што е нужно за ублажување на катастрофалната состојба со подмладокот за да може да се реализира практичната настава. Во буџетот за следната година да бидат предвидени сретства за реновирање и опремување на студентските лаборатории, како и сретства за реновирање на зградата на Институтот. Во буџетот да се предвидат сретства за финансирање на научноистражувачки проекти, вели Марина Стефова- раководителка на Институтот за хемија при ПМФ

Од условите за студирање на Институтот, незадоволни се сегашните, но и дипломираните студенти.

Технологијата и науката се во постојан подем. Меѓутоа ние немаме начин да го прикажеме целото знаење кое што го стекнуваме тука. Да го искажеме, тоа е многу тешко, вели Мирјана Саздовска-дипломиран хемиски инжинер .
Она што недостасува е модернизирање на самите инструменти, на нашите лаборатории. Тоа е она кон кое ние се стремиме, вели Христина Тришоска- студентка на 3 година на Институт за хемија

Министерот за образование и наука, Арбер Адеми, вели дека министерството одобрило 5 нови вработувања на Институтот за хемија. Но, се чека согласност од Министерството за финансии, за да се ефектуираат тие. А, пред 5 години МОН финансира инсталирање 5 лаборатории на ПМФ, од кои 2 на Институтот за хемија, дополнуваат од ова ресорно министерство.

Сотир Трајков