Продолжува 98. Рос-Рот семинарот во Собранието

Во Собранието на Република Македонија денеска продолжува 98.РОС-РОТ Семинар.

Семинарот е во организација на парламентарното собрание на НАТО во соработка со Собранието на Република Македонија на тема „Евроатланска интеграција на Западен Балкан: зајакнување на Европскиот мировен проект“.

Денешните сесии на семинарот се посветени на Земјите-НАТО аспирантки од Западен Балкан: Патот напред, Реформите во одбранбениот и безбедносниот сектор и Од Скопје до Брисел: следните чекори во евроинтегративниот процес. Најавени се обраќања, меѓу другото, на заменик – министерот за одбрана Беким Максути и на вицепремиерот за евроинтеграции Бујар Османи.

Утре ќе се одржат седмата и осмата сесија на РОС-РОТ Семинарот а се посветени на Состојбата во медиумите во земјите од Западен Балкан и влијанието на дезинформациите и погрешните информации во креирањето на јавното мислење и Меѓуетничките односи на Западен Балкан.

Семинарот започна вчера со обраќања на претседателот на Собранието Талат Џафери, премиерот Зоран Заев, претседателот на Парламентарното собрание на НАТО Паоло Али и швајцарската амбасадорка во Македонија Сибил Сутер Тејада. Клучни напомени изнесе и поранешниот американски специјален пратеник на Балканот и заменик – помошник на генералниот секретар на НАТО за операции Џејмс Пердју.

Првата сесија беше посветена на Зајакнување на правото, реформа во администрацијата и правосудството и борба против корупцијата, втората на Добрососедските односи и стабилноста на Западен Балкан: Мерки за градење доверба, а на третата сесија се зборуваше за мигрантската криза и балканската рута.