Повлечен цитостатик од парелелен увоз поради сомнителен квалитет

Повлечена е цела пратка на цитостатик од паралелен увоз. Наместо кај болните од рак на црн дроб, лекот завршил во рацете на инспекторите од Агенцијата за лекови МАЛМЕД. Пред една недела влегле во Онкологија и ги побарале сите кутии од лекот, а не само една како што е пракса. Од агенцијата за Телма потврдија дека се сомневаат во неговиот квалитет, но за деталите велат се уште е рано.

„Во една од последните инспекциски контроли појавен е сомнеж во квалитетот на лек кој бил предмет на испектирање. Постапката на испитување на лекот е во тек. Поаѓајќи од нашите професионални начела на делување се до конечно завршување на постапката за испитување и контрола не можам да ви дадам подетални информации. Би сакал да Ве информирам дека лекот во овој момент не е достапен до пациентите“, изјави Роберт Беќировски, директор на Агенција за лекови МАЛМЕД.

Директорот на онкологија тврди дека никој не ги информирал зошто се повлекува цела пратка од лекот. Кажа дека тој бил набавен преку паралелен увоз заедно со уште 5 други лекови. Уверува дека повлекувањето на лекот нема да се одрази врз пацинетите, бидејќи сите се покриени со терапија за наредните две недели.

Лекот за прв пат го набавува Онкологија. Бидејќи не е на позитивната листа, но е регистриран во државата, досега пациентите сами го купувале. Една пратка од лекот клиниката ја чини преку 10.000 евра, а количините се доволни за едномесечна терапија на пациентите. И при оваа набавка, еден од главните услови била најниската цена. Заено со останатите пет лекови набавени на истиот тендер, клиниката добила условен буџет од Фондот за здратсво.

Весна Јовановска – Дојчиновска