Вести Почина сликарот и активист Мирослав Стојановиќ- Шуки
Во 54 година од животот, ненадејно почина сликарот, мултимедијален уметник и активист, Мирослав Стојановиќ- Шуки. Ќе остане запаметен по уникатниот хумор, и по делата, работени во различни медиуми , во кои даде оригиналeн приказ на сфаќањето за човековото постоење и смислата на животот. Стојановиќ дипломира 1990 година на Факултетот за ликовни уметности во Скопје, во класата на Ристо Калчевски.
Во својата кратка , но плодна кариера тој реализира повеќе самостојни изложби во Македонија, а учествуваше и на групни претставувања во Холандија, Унгарија , Турција, Русија и во други земји. Беше дел од уметничката група Зеро и долгогодишен член на Извршниот комитет на невладината Цивил, каде работеше и како директор на „ Цивил Арт“, единица за општествено – политички одговорна и критичка уметност и култура.
По повод смртта на Мирослав Стојановиќ, во „ Цивил“ денеска напладне беше отворена книга на жалоста. Од таму информираат дека погребот ќе се одржи во Ниш, родниот град на Стојановиќ, а датумот и времето на погребот и на комеморацијата по повод неговата смрт, ќе бидат соопштени дополнително.
