По сторијата на Телма, ќе се дислоцира стовариштето од пред куќата на Цветкови

Семејството Цветкови од селото Теранци во Општината Чешиново-Облешево конечно ќе има мирен живот, откако пред пет месеци на три метри од нивната куќа беше отворено стовариште за песок. По сторијата на Телма комуналниот инспектор и градоначалникот, Горанчо Крстев утринава излегле на терен. Донесена е одлука под итно да се затвори стовариштето за песок на локалната градежна фирма на оваа локација.

Градежната компанија мора да најде локација за своето стоварише, но таа да биде надвор од селото, за да не им прече и на семејството Цветкови, но и на останатите жители. Категорично тврдам дека на фирмата немам издадено дозвола да работи на оваа локација. Тоа може да се види и во општинската документација, вели Горанчо Крстев градоначалник на Чешиново-Облешево.

Пред два дена брачниот пар Цветкови пред камерата на Телма говореа дека речиси половина година домот им бил затворска ќелија, поради бучавата од камионите, но и прашината, која се кревала по преработка на песокот.

По денешниов увид од локалната власт на компанијата и е даден рок од еден ден да ги дислоцира машините и песокот надвор од селото Теранци.

Викторија Јованова