Платеното политичко рекламирање на грбот на граѓаните

Агенцијата за аудио и аудиовизуелни медиумски услуги ги оценува како скандалозни  усвоените измени во Изборниот законик со кои платеното политичко рекламирање за време на изборните процеси што досега учесниците во изборите им го плаќаа на медиумите од своите сметки, ќе се плаќа од Буџетот на Република Македонија, преку Министерството за финансии.

Измените на Изборниот законик беа донесени по скратена постапка во Собранието на Република Македонија, а по претходен договор на лидерските средби на политичките партии. Од АВМУ, наведуваат дека трошоците за платено политичко рекламирање и неговиот обем по медиумите досега беа ограничени од финансиските можности на политичките субјекти, додека новото решение овозможува тие да се зголемат затоа што ќе се плаќаат од парите на граѓаните.

Тврдат дека новата одредба за дополнителните лимити за платено политичко рекламирање на радијата и телевизиите, повторно не обезбедува еднакви услови за пристап до платеното политичко рекламирање за сите учесници во изборниот процес, затоа што им дава предност на партиите од власта и од парламентарната опозиција, а воопшто не предвидува време за рекламирање за независните кандидати.

Ова  велат од АВМУ значи мешање во уредувачката слобода на медиумите затоа што медиа плановите за платено политичко рекламирање наместо медиумите ќе ги подготвуваат учесниците во изборната кампања.

Од АВМУ реагираат дека наместо да се избрише обврската за мониторинг на медиумското претставување на интернет порталите по двегодишните укажувања од Агенцијата за аудио и аудиовизуелни медиумски услуги, Здружението на новинарите на Македонија, граѓанскиот сектор и стручната јавност, затоа што е спротивна на европските стандарди, со измените обврски за мониторинг на порталите и се наметнуваат на Државната изборна комисија.

 

Објавено на
© 2025 Телевизија Телма. Сите права се задржани.
Текстов не смее да се печати или емитува, во целина или во делови, без договор со Телевизија Телма.

СЛИЧНИ ТЕКСТОВИ