Вести Ново палење на контејнери
Повторно запалени контејнери во главниот град. Непознати сторители вчеравечер запалиле два контејнера, едниот бил новопоставен пред Генералштабот во Центар, а вториот запален е од старите контејнери во наслебата Чаир, информираа од „Комунална хигиена“.
Ваков инцидент се случи и пред два дена кога во една ноќ беа запалени осум контејнери во населбите Ѓорче Петров и во Ново Лисиче. Огнот предизвика голема материјална штета, а беа оштетени и две возила кои биле паркирани во близина на опожарените садови за отпад.
Претходно, во населбата Радишани изгореа три контејнери и еден специјален контејнер-ѕвоно, наменет за селекција на стакло, како и еден нов контејнер на улицата Франклин Рузвелт.
Сите случаи на опожарување на контејнерите се веќе пријавени во полиција и се очекува да бидат преземени соодветни мерки за да се пронајдат и санкционираат сторителите. Градот Скопје и „Комунална хигиена“ апелираат до граѓаните да ги чуваат и да не ги оштетуваат контејнерите бидејќи истите се набавуваат со пари од граѓаните, а со нивното оштетување се нанесува голема финансиска штета.
