МНР: Македонските државјани да ги избегнуваат местата на протестите во Грција

Министерството за надворешни работи упати предупредување до македонските државјани кои денеска планираат да патуваат во Грција да ги избегнуваат местата на одржување на најавените протести за „грчкиот карактер на Македонија“ во 24 поголеми градови во северниот дел од државата заради потенцијална можност од нивна ескалација.

– Се информираат граѓаните на Република Македонија кои денеска, ќе бидат или планираат да патуваат во Грција, дека грчката организација „Комитет за борба за грчкиот карактер на Македонија“, најавува протести во четиринаесет поголеми градови во Северна Грција против употребата на зборот „Македонија“, што ќе се одржат со почеток во 19:30 часот. Заради потенцијалната можност од ескалација на протестите, се предупредуваат граѓаните на Република Македонија да ги избегнуваат местата на нивно одржување, како и од секакви реакции кои би имале негативни последици по нивната безбедност, стои во соопштението.

Организаторите на денешните протести се од „Комитетот за борба за грчкиот карактер на Македонија“ и во повикот до граѓаните објавен на социјалните мрежи се вели дека Грците ќе дадат уште една битка за грчкиот карактер на Македонија. Според организаторите кои ги повикуваат граѓаните да учествуваат со грчки, а не со партиски знамиња, карактеристиката на централниот собир ќе ја има градот Пела, родниот град на Александар Велики.

Протестите се поддржани од дел од градоначалниците на градовите каде што ќе се одржат, но и од митрополити.