Меркел: Спорот за името се приближува кон конечно решение

Спорот за името меѓу Македонија и Грција треба да биде решен, но вршење било каков притисок не може да има позитивно влијание врз процесот, изјави германската канцеларка Ангела Меркел на заедничката прес-конференцијата со македонскиот премиер Зоран Заев во Берлин.

– Спорот меѓу Македонија и Грција треба да биде решен, притисокот во преговорите не носи корист. Имам впечаток дека двете страни по долго време имаат интерес за решавање на спорот. Тоа е добар предуслов, рече Меркел, одговарајќи на новинарско прашање за тоа дали на средбата со Заев се разговарало за спорот со Грција и дали истото прашање било тема на вчерашниот телефонски разговор со Алексис Ципрас.

Германската канцеларка истакна дека Македонија е поблиску од кога и да е во изминатата декада до решение за спорот со Грција околу името, кој го попречува интегрирањето на земјата во ЕУ и НАТО.

– Ми претставува големо задоволство тоа што има придвижување во преговорите. Во изминатите десет години решението не било толку блиску како што е сега и би било извонредно доколку двете страни успеат да ги премостат препреките, истакна Меркел.

Таа напомена дека и двете страни се однесуваат одговорно во обновените преговори и оти и Грција и Македонија знаат што можат да дадат за да се постигне компромис.

– Компромисите се секогаш болни, но и неопходни. Тоа е дипломатска уметност и за тоа не треба да се зборува на прес-конференции туку зад затворени врати. Верувам дека изјавите во јавност повеќе може да му наштетат, отколку да му користат на процесот, додаде германската канцеларка.

Објавено на
© 2025 Телевизија Телма. Сите права се задржани.
Текстов не смее да се печати или емитува, во целина или во делови, без договор со Телевизија Телма.

СЛИЧНИ ТЕКСТОВИ