Мажот најден кај Горна Матка бил ликвидиран со куршум во глава

Со куршум во глава бил застрелан мажот чие тело пред три дена беше најдено закопано под карпа над селото Горно Матка.

Од истрагата за Телма потврдија дека станува збор за насилна смрт, убиство и дека починатиот имал повреда од огнено оружје на главата. Убиениот уште не е идентификуван, а се врши и ДНК анализа која треба да помогне во откривање на идентитетот на жртвата.

Полицијата првично ја споредила и облеката која ја носел убиениот со пријавите за исчезнати лица, но засега нема поколопување на податоците. Истрагата продолжува.

Телото на ликвидираниот маж беше закопано на пусто место познато како излетничка локација. Убиениот бил закопан, но диви животни го ископале горниот дел од главата што е откриено при полициско патролирање во тој реон.

Од местото се подигнати и повеќе чаури, а според полициски информации на местото на злосторството често доаѓале и луѓе кои пукале од огнено оружје. Се проверува дали некоја од чаурите одговара со куршумот најден во телото на убиениот.

Во близина на местото и екипата на ТВ Телма во саботата пронајде чаура од куршум за пиштол.