Македонија „Катимерини“: Илинденска Македонија е предлог на македонската делегација
Името „Илинденска Македонија“, според информациите од македонската делегација е предлогот на премиерот Заев што му го соопштил на Ципрас на нивната средба во Софија, пишува грчкиот весник „Катимерини“.
„Очигледно ова решение не е дефинитивно бидејќи слични имиња беа ставени на маса во соседната земја и во неодамнешно минато (на пример, Крушевска Македонија). Исто така, не е јасно дали Атина го прифаќа ова име и е основа за дискусија за можно решение или, пак, тоа е само потег на македонската Влада за преговорите да добијат реален импулс“, пишува весникот.
„Катимерини“ исто така пишува дека Ципрас за време на викендов ќе ги информира претседателот на државата и политичките лидери за што разговарал со својот македонски колега.
Заев вчера на прес-конференција во Скопје посочи дека пријателството меѓу Македонија и Грција е веќе изградено и повтори дека има можно решение за кое ќе се дискутира одделно во двете држави. Во однос на решението потенцира дека станува збор за комплетно решение во кое е вклучена употребата на името, јазикот, идентитетот и опсегот на употреба, а не само парцијално.
