Вести Границите на ЕУ остануваат затворени за македонските граѓани
Границите на Европската унија остануваат затворени за македонските граѓани. Европската совет ја објави листата на земји за кои ги крева рампите за влез. Македонија не е меѓу нив. На листата се наоѓаат 14 држави Алжир, Австралија, Канада, Грузија, Јапонија, Црна Гора, Мароко, Нов Зеланд, Руанда, Србија, Јужна Кореја, Тајланд, Тунис и Уругвај. И Кина е на листата како 15-та, но со услов на реципроцитет, поточно ако таа ги затвори границите за европските граѓани, тогаш и нејзините нема да можат да влезат во Унијата.
Македонија не ги исполни здравствените параметри за да можат нејзините граѓани да патуваат во ЕУ.
„Бројот на нови случаи на Ковид-19 во изминатите 14 дена на 100.000 жители треба да биде блиску или под просекот на ЕУ (како што е наведено на 15 јуни 2020)“.
Тој просек е 16 заболени, додека земјава има седум пати повеќе, поточно во изминатите 14 дена има 94 заболени на 100.000. Освен ова, земјите за да добијат зелено светло треба да имаат и стабилна бројка на заболени или таа да се намалува во период од две недели, а се анализира и бројот на тестирања, надзорот, следењето на контактите, третманот на заболените.
Иако се работи за препораката од Советот која не е легално обврзувачка и земјите-членки се одговорни за нејзиното спроведување, тие можат да ги укинат ограничувањата на патувањето само кон наведените земји.
„Земја-членка не треба да донесен одлука да ги укине рестрикциите за патување кон трети земји кои не се на листата, пред пред за тоа да се донесе одлука на координиран начин“.
Доколку во некоја од земјите нагло се влоши состојбата со коронавирусот, и пред истекот на двете недели до ревизијата, таа може да се најде на листата на забранети земји.
Од регионот на листата, освен Македонија, не се најдоа и Албанија, Босна и Херцеговина и Косово. Освен во земјите од ЕУ, нивините граѓани нема да можат да патуваат ни во Норвашка, Швајцарија, Исланд, Лихтенштајн, кои се дел од од Шенген зоната.
Тамара Грнчароска
