Филипче не знаел за ниската плата на докторката од Дебар

Министерот за здравство Филипче не знае како се случило младата докторка во болницата во Дебар да биде вработена со договор на дело и да добива плата од 15 илјади денари, без платени придонеси. Побарал објаснување од директорот на болницата во врска со целиот случај кој ја разбранува јавноста и најмногу ги разгневи токму младите лекари специјализанти кои застанаа во нејзина одбрана.

Министерот е сигурен дека во иднина ќе ги мотивира специјализантите да работат во земјава – со петстотини евра плата во здравствените домови. Но, од друга страна, матичните лекари ги критикуваат тие политики и бараат висока плата и за оние поискусни лекари, за да може да се каже дека добро функционира целиот здравствен систем.

На ова се надоврзаа од Здружението на матични лекари со прашањето – како е возможно матичните лекари коишто работат во помали места, а имаат повеќе децении стаж – да бидат исто платени како и младите лекари почетници.

Прашањето за платите на специјализанти повторно се актуелизираше деновиве. Случајот со докторката во Дебар ги крена на нозе и здруженијата и асоцијациите на младите лекари, коишто на социјалните мрежи реагираа и прашаа како да останат да работат во земјава ако се платени малку.

Петар Догов