Македонија

Драганчо Стоименов, поранешен телохранител на Мијалков, се предаде во кочанското обвинителство по два месеци бегство

Поранешниот телохранител на Сашо Мијалков, Драганчо Стоименов познат како Дацо Белски по речиси три месеци  бегство самиот се предаде.

Тој  во присуство на адвокат утринава се пријавил во Основното јавно обвинителство во Кочани.

Обвинителството останува на предлогот  судијата во претходна постапка  да му одреди мерка притвор, поради бегството но и да не ја попречува истрагата. 40-годишниот Стоименов од средината на Јануари е во бегство, откако во угостителскиот објект „Аква“ во Кочани со пиштол пукаше во 33 годишниот Драган Здравев од Кочани познат како Дач.

Обвинителството по настанот му поднесе кривична пријава за обид за убиство, а Здравев тогаш со тешки повреди заврши во Клиничкиот центар во Скопје.

Стоименов или Дацо Белски не е непознат на македонската јавност, тој беше клучниот сведок во случајот Детонатор, а во кој за рекетарство, перење на пари, поставување на бомби и покер апарати на обвинителната клупа седнаа 16 лица од Кочани и Виница, но и повод да се сменат вкупно 13 полициски командири, меѓу кои и тогашниот  началник на СВР-Штип.

Осудените од кои дел и со доживотни казни затвор тврдеа дека се жртви на Стоименов. Токму во тој период на Стоименов  беа поставувани и бомби под автомобилите, пукано со ловџиска пушка, а последен инцидент му беше и со Александар Василевски-Нинџа.

Инаку оштетените во случајот Детонатор од Врховниот суд побараа преиспитување на првостепените пресуди.

Судиите од овој суд во февруари годинава барањето им го одбија како неосновано, а образложението од  21 страна им е дадено во пресудата.

Викторија Јованова