Џафери: Иванов ќе го прекрши Уставот ако не го потпише Законот за јазиците

Претедателот на Република Македонија Ѓорге Иванов ќе ги прекрши уставните одредби доколку не го потпише указот за прогласување на Законот за јазиците, изјави денеска претедателот на Собранието Талат Џафери, по синоќешната најава на шефот на државата дека нема да го потпише указот за овој закон.

Џафери не сакаше да коментира што во случај Иванов да не го потпише законот.

– Нема да коментирам што ќе биде ако биде. Членот 75 од Уставот на Република Македонија е јасен и по повторното гласање со мнозинство гласови од вкупниот број пратеници во Собранието, што е случај со законот, претседателот на Републиката е должен да го потпише указот за прогласување на законот. Во спротивно ги крши уставните одредби, изјави Џафери по денешните свечени изјави на новите членови на Судскиот совет во законодавниот дом.

Според претседателот на Собранието, одредбата од членот 75 од Уставот е јасна. Суспензивно вето не може да се стави кај закони што се носат со двотретинско мнозинство, додека вето може да се стави само на закони кои се носат со просто мнозинство или со една третина минимум гласови.

– При повторното гласање за тој закон мора да биде со мнозинство од вкупниот број на пратеници, а во случајов, законот го доби потребното мнозинство. Впрочем законот и претходно го доби мнозинството потребно во нормите на Уставот. Останува обврска тоа да се спроведе, рече Џафери.

Првиот парламентарец не сакаше да ја коментира најавата на лидерот на ВМРО-ДПМНЕ Христијан Мицкоски за кривична пријава против Џафери за флагрантно кршење на Уставот и законите.

– Не коментирам такви најави. Тоа е став на политика, рече Џафери.

Според Џафери, за да се објасни начинот на носење на Законот за јазиците потребна е поширока дебата, и тоа не може да се одговори само на новинарско прашање.

Собранието вчера во тензична атмосфера со 64 гласа „за“, без против и воздржани по втор пат го донесе Законот за јазиците, без амандманска расправа. За Законот гласаа и пратениците од немнозинските заедници со 24 гласа.

Законот, кој првпат беше изгласан на 11 јануари, повторно се најде пред пратениците откако претседателот Иванов не го потпиша и го врати на повторно разгледување во Собранието.

Претседателот Иванов вчера изјави дека нема да стави потпис на указот за прогласување на повторно изгласаниот закон бидејќи тоа не му го дозволуваат совеста и Уставот.