Вести Апатурај: Назадување со Договорот од Преспа ќе има последици за земјата во НАТО
Г-дине Апатурај, очекувањатa се Шпанија до март да го ратификува Протоколот за Северна Македонија, со што земјата ќе стане и полноправна членка. Сепак интеграцијата во армискиот дел ќе трае уште неколку години. Кога може да се очекува целосната интеграција на земјата во структурите на Алијансата?
– Од наша перспектива, пред се ние правиме одличен прогрес, но како второ, во моментот кога ние ќе го поминеме прагот и Пристапниот протокол биде потпишан и депониран во Вашингтон, како што велите во март или април, се надеваме март, земјата е полноправна членка на НАТО. Се рабира дека треба да има понатамошни чекори. Од дипломатската страна сите ќе мора да имаат безбедносно одобрение, ќе мора да продолжиме со тој процес. Во воениот дел ќе мора да имаме целосна интеграција во структурите и тоа исто така ќе одземе малку време. Тоа се важни, но технички прашања. Реалноста е дека од моментот кога Северна Македонија ќе стане членка, ќе биде полноправна членка во се.
Безбедносниот и одбранбениот сектор се во фокус на НАТО за реформите кои треба да се спроведат за таа цел во земјата. Во која фаза се реформите во моментов?
– Она што го видовме е дека Северна Македонија го започна патот на реформите и на суштинските реформи и многу сме, навистина, благодарни на тоа. Ние работиме многу блиску со земјата, имаме своја канцеларија таму која работи на тоа со властите. Земјата достави програма на реформи. Таа програма на реформи веќе започна, продолжува низ пристапниот процес, но и ќе продолжи со години потоа. И она што е многу важно е дека продолжува, во области како што се реформите во разузнавачкиот сектор, реформата на одбранбениот сектор. Ние ќе очекуваме тие реформи да продолжат. Тие се добри за земјата, добри се за нас, бидејќи земјата ќе може повеќе да придонесува како НАТО-сојузник. Веќе се почнати и ќе траат со години.
Целосна имплементација на Договорот од Преспа е она што го бара НАТО од Северна Македонија. Доколку тоа не се случи или има реверзибилност во имплементацијата какви последиците би имала земјата во рамки на НАТО?
– Штом Северна Македонија влезе во НАТО, таа е членка на НАТО. Сметам дека тоа треба да биде многу јасно. Тој пат, тој воз ја напушти станицата. Но и покрај тоа, мислам дека има две вистински импликации ако има некакво назадување. Едната е многу значајна – политичка импликација во рамки на оваа Организација, бидејќи секако пристапувањето беше засновано на многу важното решавање на договорот за името. Но исто така ќе кажам дека ќе има политичка цена, зборувам за нас, не зборувам во име на ЕУ, но тоа е суштински елемент на прогресот на Северна Македонија кон ЕУ. И мислам дека никој не треба да ги потцени негативните последици ако има назадување од Договорот за името. Сметам дека патот на кој Северна Македонија е сега со Преспанскиот, со Договорот за името, ги покажува сите резултати кои ги очекувавме – членството во НАТО и се надевам, и очекувам исто така, напредок и кон членството во ЕУ.
Тамара Грнчароска
