Раскинат договорот за Казандол

Владата донесе одлука да го прекине договорот за рудникот Казандол, со компанијата Сардич, соопшти премиерот Заев на пресконференција.

Премиерот Зоран Заев попладнево на прес-конференција во Владата соопшти дека донеле одлука за едностран раскин на договорот за концесија на локалитетот Казандол кој се наоѓа во близина на општините Валандово, Богданци и Дојран.

„Владата е посветена на здравјето на граѓаните, здравјето е поважно од било кој приватен интерес и ова е порака до граѓаните на општините Валандово, Богданци и Дојран“, изјави Заев денеска на прес-конференцијата во Скопје.

Тој рече дека договорот го раскинуваат бидејќи концесионерот не ја исполнил обврската во рок од две години од денот на доделување на концесијата да изгради постројка за експлоатација на катоден бакар. Заев додаде и дека Владата нема да плаќа пенали бидејќи концесионерот не го испочитувал договорот.

„Овој услов е суштинска состојка на договорот, бидејќи е даден во јавниот повик. Ако не постоел овој услов, можеби ќе се јавеле уште концесионери“, појасни премиерот одговарајќи на новинарско прашање дали Македонија може да се соочи со тужба вредна неколку стотици милиони евра поради едностраното раскинување на договорот.