По два месеца во Тетово се враќа организираниот јавен превоз

Владата на вчерашната седница го прифати предлогот на Комисијата за заразни болести при Министерството за здравство за престанување на точката 9 од Одлуката за забрана и посебен режим на движење на територијата на Република Северна Македонија и со тоа се овозможува да се врати редовната состојба на организиран превоз на патници од и во подрачјето на Општина Тетово, и од општините Теарце, Боговиње, Желино, Врапчиште, Гостивар, Јегуновце, Брвеница, Маврово, Ростуше и град Скопје.

Градоначалничката на општина Тетово, Теута Арифи, информираше дека официјално е известена полицијата, односно испратено е решение до СВР Тетово.

Забраната за организирање јавен превоз на патници со автобуси и комбиња, за излез и за влез во Тетово од полошките општини и Скопје беше воведена од 21 април, како една од мерките за заштита од ширење на заразата со Ковид 19. Истата предизвика потешкотии кај граѓаните кои работат во Скопје и Тетово, а немаат сопствен автомобил.

Данијела Билбилоска