Десетици милиони луѓе ќе останат без работа поради коронавирусиот

Глобалните загуби на работни места како резултат на кризата со коронавирус би можеле далеку да ја надминат бројката од 25 милиони граѓани, како што беа проценките пред само неколку дена, оценија официјални претставници на Обединетите нации, истакнувајќи дека извештајот за раст на невработеноста во САД експлицитно укажува на големината на економската катастрофа.

Минатата недела, Меѓународната организација на трудот (МОТ) процени, врз основа на различни сценарија за влијанието на пандемијата врз глобалниот економски раст, дека бројот на невработени на глобално ниво ќе се зголеми за меѓу 5,3 и 24,7 милиони луѓе.

Но, Сангеон Ли, директор на Секторот за политика за вработување при МОТ, вчера изјави дека обемот на привремена невработеност, технолошки вишок и бројот на барања за помош поради невработеност е далеку поголем од првично проценетиот, пренесува Ал Џезира.

„ Ќе дадеме се од себе за да го земеме предвид влијанието на привремената масовна невработеност при моделирање на нашите проценки. Интензитетот на оваа флуктуација е многу поголем отколку што се очекуваше. Проекцијата за загуба на работни места ќе биде многу поголема, далеку над 25 милиони, како што претходно проценивме“, рече тој.

Алармантно предупредување упати и претседателот на филијалата на Федерални резерви во Сент Луис Џејмс Булард, кој процени дека до 46 милиони Американци, односно речиси третина од американските работници, би можеле да ги изгубат работните места за кус временски период