Скриените давачки преголем товар за компаниите

Од 50 денари до 18 милиони денари или речиси 300.000 евра – толку може да плати една компанија во земјава по државните институции за такси, надоместоци, дозволи, одобренија, лиценци. Бизнисот алармира дека скриените давачки се преголем товар за стопанството и бараат итна реформа и нивно намалување.

Во Македонија 99,7 проценти се мали и средни претпријатија каде што парафискалните давачки претставуваат поголем товар и во процент и од фискалните давачки,
вели Неби Хоџа од Комора на северозападна Македонија.

Парафискалните давачки кај малите и средни претпријатија тие најчесто надминуваат дупли износ од она што компаниите го плаќаат за даноците на годишно ниво. Тоа знае да е значителен трошок за компаниите и е нешто кое е потребно под итно да се адресира и да се направат реформи во насока на намалување на овие парафискални давачки,
вели Данела Арсовска од ССК.

Компаниите најмногу се жалеле на тоа што два пати плаќаат и здравствено осигурување за работникот и секои 18 месеци за систематски преглед. Потоа за тоа дека се превисоки трошоците за одржување на фискалните апарати како и за фирмарината која ја плаќаат на општините која е иста и за фирма со 1.000, но и за компанија со еден вработен.

Од Институтот „Финанце Тхинг“ пак кои ја правеа анализата велат дека некогаш времето за менаџирање со овие скриени давачки е многу поголем товар за компаниите и од финансискиот.

86 проценти од поднесоците се уште се поднесуваат на писарница, шалтер или архива, помалку се оние кои се дигитализирани и електронски се поднесуваат. Непостоењето на централно тело кое би ги координирало парафискалните давачки создава проблем на понатамошна рационализација на парафискалните давачки и зголемување на ефикасноста,
вели Благица Петрески од „Финанце Тхинк“.

Од Владата ветуваат дека работат на нивно намалување.