Филипче ќе предложи побрзо воведување вонредни мерки при зголемена загаденост

Министерот за здравство ќе иницира на владино ниво да се разговара за намалување на критичните граници коишто со себе повлекуваат и воведување вонредни мерки заради големо загадување на воздухот. Вонредните мерки ги опфаќаат луѓето коишто работат надвор и ним им се реорганизира работното време, се забрануваат спортски натпревари на отворено, се намалува употребата на службени возила за 50%. Во овој момент, границата дефинирана во правилникот на Министерството за животна средина е 175 микрограми ПМ честички. Ако два последователни дена воздухот е загаден повеќе од тоа, а за следниот ден не се прогнозираат поволни временски услови, тогаш се вклучува и црвениот аларм.

За докторите логични се ваквите иницијативи на министерот. Она што сепак го потенцираше Ангелчо Андоновски, директорот на Институтот за белодробни заболувања кај децата „Козле“, е дека нема ниту една државна студија во која опширно се објаснети ефектите на аерозагадувањето. Тоа што постои како научен труд е сработено самоиницијативно од докторите коишто се ентузијасти за тоа и самите се ангажираат. Во „Козле“ секојдневно има стотина пациенти на преглед со потешкотии поврзани најмногу со загадениот воздух.

Аерозагадувањето се дискутираше и на Советот за безбедност кај претседателот Пендаровски. Активистите неколку недели се мобилизираат, а двапати организираа и протести со рута од пред Министерството за животна средина, па се до Владата. Една од главните мерки на Владата е субвенционирање на еколошки начини на греење со инвертер-клими, а доделувањето ваучери ќе започне од следниот месец. Аткивистите имаат цела листа на барања и очекуваат порадикални мерки од властите.

Петар Догов