Вести Нема казни за загадувачите во општините
Инспекторите за животна средина во општините не напишале ниту една казна за загадувачите, а главниот градски инспектор причината за тоа ја наоѓа во непотполните правилници за казнување. Граѓаните и еко-активистите гласно негодуваат за тоа, додека се чека на Министерството за животна средина да го измени тој правилник.
На главниот градски инспектор му одговори еден од еколошките здруженија кој дојде денес да дебатира за загадувањето во просториите на Општина Центар. Петар Бошевски од Екоскоп вели – доста веќе вината ја бараме во некакви правилници и се лажеме со некакви реформи.
Во очи на грејната сезона и загадувањето коешто следи – од Инспекторатот на Град Скопје сепак посочија и една реформа. Комунален инспектор, инспектор за животна средина, комунален редар и полицаец. Сите овие во еден автомобил ќе патролираат низ градот и ќе бараат кој тоа ја загадува животната средина. Новитет е присуството на полицијата во овие патроли.
Од 2018 година наваму, во 4 скопски општини биле изречени 20 казни за загадување, стои во некои од анализите за загадувањето на „Зелениот институт“ од каде што ги организираат овие дебати со граѓанскиот сектор. А, надлежните за да казнуваат повеќе ќе се ангажираат и со дрон да ловат загадувачи.
Петар Догов
