Вести Застој во преговорите за ЈО
Уште еден ден на најавени или очекувани, но неодржани преговори за идниот Закон за обвинителство. Од Министерството за правда велат дека постојано има некакви контакти, а средба ќе биде закажана веднаш штом ќе се усогласат термините. Додека трае формалниот застој, СДСМ и ВМРО ДПМНЕ меѓусебно си ја префрлаат одговорноста.
Лидерот на опозицијата, Христијан Мицкоски, во интервју за МИА споделува чувство дека СДСМ намерно го кочи процесот од две причини: за да потсетува на некои стари теми кои можеби не биле поволни за ВМРО ДПМНЕ а сега можат да и конкурираат на аферата Рекет, и за да имплементира, како што вели, „правно насилие во пресметката со политичките неистомисленици“. Од партијата додаваат дека нема договор за законот бидејќи власта, соочена со висока корупција и со скандали, се плаши од одговорот на реформираните институции.
Подобро да немаме закон отколку да донесеме лош закон, вели министерката Рената Треневска Десковска во интервју за Канал 77. Објаснува дека предлогот што е во собраниска процедура е во согласност со Стратегијата за реформи и подразбира обврска за трансформација на СЈО во посебен орган во рамки на Обвинителството. Ги обвини ВМРО ДПМНЕ дека не сакаат да се спомене ниту С од СЈО и дека настојуваат да направат дупки во законот кои ќе овозможат скриена амнестија.
Од СДСМ инсистираат ниту еден случај и ниту една истрага што сега се наоѓа во рацете на Јавното обвинителство да не остане нерасчистена.
Зоран Заев од Берово а Мицкоски преку интервју, порачаа дека се подготвени за уште една лидерска средба веднаш штом работните групи ги доближат ставовите. Наредниот состанок, според СДСМ, ќе биде викендов, а според ВМРО ДПМНЕ, тогаш кога ќе предложи власта.
Соња Николовска
