Поставени канти за ѓубре низ Скопје како дел од артивистичките акции

Поттикнати од последните анализи и истражувања дека во поголем дел од Шведска воопшто нема ѓубре и затоа го увезува од странство,за да ги продолжи процесите на рециклирање со кои произведува огромни количества електрична енергија и гориво, Единицата за брзи артивистички акции, на повеќе локации во главниот град постави канти за ѓубре или таканаречени солидарни пунктови, со цел да и’ помогне на оваа скандинавска земја.

Со оваа акција би сакале да ги мотивираме нашите граѓани да бидат солидарни со пријателската Шведска и воедно да размислиме за нашата повеќедецениска традиција на фрлање и трупање ѓубре насекаде, велат од Единицата за артивистички акции.

За потсетување, уште од почетокот на 90-тите години, Шведска применува сеопфатен систем за селектирање и рециклирање на отпадот. Низ ревидирање на законската рамка и во тесна соработка со стопанството и граѓаните, Шведска направи еколошки свесно општество. Но, кај нас мака мачиме со собирање на ѓубрето, појавата на бројни диви депонии, фрлањето ѓубре во природата и насекаде каде што поминал човек.

Апелираме до локалната и централната власт да обезбедат: ефективен систем за рециклирање и заштита на животната средина, почитување на законите, постојана едукација и подигање на свеста, оптимален број на канти за ѓубре за селекција на отпадот, редовно празнење и сервисирање на веќе поставените, оштетени канти за ѓубре и контејнери, од користење или негрижа, велат артивистите.

Сега е моментот да се обединиме и да му помогнеме на братскиот шведски народ, зашто Скопје бил и е град на солидарноста, дополнуваат од Единицата за брзи артивистички акции.