Вести Хан: Северна Македонија направи многу
Северна Македонија направи многу, оценува еврокомесарот за проширување Јоханес Хан во интервју за Дојче Веле. Тој објаснува дека секоја земја кандидат за членство ќе биде оценувана одделно врз основа на својот напредок и постигнувања. „Не можам да го предвидам процесот на донесување одлуки во земјите-членки. Факт е дека Македонија направи многу и притоа, не само во рамките на она што ние го баравме, туку исто така и со решавањето на спорот за името, но и со решавањето на билатералниот конфликт со Бугарија. Северна Македонија создаде еден предуслов со што стана единствената земја во регионот која нема конфликт со ниту еден сосед, вели Хан за Дојче Веле.
На прашањето дали тоа значи дека, доколку во Албанија не се постигне некаков компромис, Северна Македонија ќе може да ги отвори преговорите со ЕУ?
Нашиот став отсекогаш е дека секој одделен процес, односно преговорите за проширување, се процес кој се базира врз заслуги и постигнувања на секоја одделна земја. Нема да биде фер доколку една земја треба да чека некоја друга, ако таа не испорачува. Тоа е основата. Секако, би било идеално, кога сите шест (земји од западниот балкан, н.з.) Се приклучат во исто време, но тоа е нереално. Истовремено, неправедно е некој, кој силно се ангажирал, кој изнаоѓал решенија, кој е подготвен на компромис, кој донесува тешки одлуки, сега да биде казнет, затоа што е подобар, вели Хан.
