Локални ветувања за локални избори

Туризмот, инфраструктурата, иселувањето, екологијата, се само дел од темите на кои се темелат ветувањата на петмината кандидати за градоначалници на Охрид.

СДСМ и ВМРО ДПМНЕ предложија познати личности и истакнати доктори. Избор на владеачката партија е Константин Георгиевски, специјалист интернист, советник и веде градоначалник. Опозициската партија го предлага неврохирургот од болницата Св. Еразмо, Митре Милошоски.

Михаил Трендафилов-Нанче од ГДУ, на јавноста и е познат како претседател на здружението Совест.

Стевче Стевоски е кандидат на релативно новата партија Демократи. Работел како инспектор во СВР Охрид а на минатите избори беше независен кандидат.

Џемал Мена е кандидат на БЕСА. Смета дека како градоначалник ќе треба да ја врати надежта кај Албанците.

За испразнетото градоначалничко место во Дебар се кандидираа двајца познати доктори: Хекуран Дука од ДУИ и Арбен Аголи од БЕСА и Алијанса. Дука е специјалист уролог кој во 2017 стана советник, а во моментов ја врши градоначалничката функција како веде. Неговиот предизвикувач, Аголи, е педијатар, кој на последните локални избори исто така беше кандидат за градоначалник од Алијансата, но загуби со мала разлика.

Градоначалник ќе се бира и во Ново Село. Стопанственикот Никола Андонов од СДСМ има градоначалничко искуство, бидејќи функцијата ја извршуваше и во периодот 2005-та-2009-та. Николчо Стоилков е прв човек во општинскиот комитет на ВМРО ДПМНЕ, по професија правник вработен во Царинската управа.

Во овие три општини ќе се гласа паралелно за претседател и за градоначалник на 21 април, и евентуално во втор круг на 5 мај.

Соња Николовска