Болните од ХМЛ бараат да се промени позитивната листа на лекови за долгорочно да имаат терапија

Терапија има за уште неколку месеци, но што потоа? – прашуваат болните од хронична миелоична леукемија како и здруженијата за нивна поддршка. Бараат здравствените власти да ја променат позитивната листа на лекови, за пациентите да не живеат во неизвесност за своето здравје.

Од Министерството за здравство и Фондот набавиле лекови само за оваа година, а на позитивната листа се наоѓа еден лек за ова заболување.

Доколку пациентите ја набавуваат терапијата приватно, таа ги чини 4 илјади евра месечно.

Оставени се на државата – да им обезбеди современи лекови. Или да ја примаат старата терапија која повеќе не се користи никаде во светот и која би ја добиле преку донации.

„Од пет можни лека, сега имаме четири, од кои еден е на позитивна листа, Гливек, ставен во 2011 година. Еден пациент кога прима еден лек, треба да продолжи со тој лек. Не може секој нареден тендер пациентот да добива друг лек кој произведува различни сајд-ефекти. Тоа не е океј и никаде не се практикува во светот“, кажа Пепо Леви – Здружение на заболени од хронична миелоична леукемија.

„Скапа е терапијата, 4 илјади евра месечно. Мора да се интервенира од страна на сите институции, а посебно од Министерството за здравство и Фондот и позитивната листа е најбитно да се промени“, кажа Бојана Караџова Данилова – Ќерка на починат пациент.

Од Министерството за здравство ветија дека ќе ја променат позитивната листа и ќе се обидат на долг рок да го решат проблемот со недостатокот на лекови. Сепак, не сакаат да кажат дали тоа ќе се случи пред пациентите да останат без терапија.

Петар Догов