2000-3000 евра месечно чини лекот за децата со вродени срцеви аномалии

Родителите на децата со вродени срцеви аномалии кои имаат пулмонална хипертензија бараат од Министерството за здраство итно да се стави лекот босентан на позитивната листа, во спротивно децата ќе ја изгубат битката со животот.

Оставени да се снаоѓаат како знаат и умеат месечно за лекот одвојуваат и до 3000 евра. По смртта на возрасен пацинет со истата дијагноза, во нашата редакција се јавија двајца родители на деца на кои им е неоходен лекот и кој го примаат со години.

Финансиски се исцрпени. Бараат помош од државата. Проблемот кај нив е што децата им се со примарна кардиолошка дијагноза, а хипертензијата е секундарна и поради тоа мора приватно да го купуваат лекот од други држави.

Родителот на дете од Куманово вели дека се соочува со опасност од компликации и неможност да се изврши хируршка интревенција.

Здружението за ретки болести ,,Живот со предизвици“, апелира итно да се реши проблемот и да се набави лекот. Недозволиво е да се лекува примарната болест, а секундарната да остане нетретирана.

Министерот за здраство Венко Филипче вели дека овој проблем го наследил. Вети дека ќе се заложи за набавка на босентан.

Филипче најави дека наскоро ќе се ревидира листата со лекови. Убеден е дека проблемите ќе се надминат откако ќе почне да функционира приватното партнерство за детска кардиохирургија каде на едно место ќе се има увид за здраствената состојба на секој пациент.

Јулијана Пешевска