Тинејџерката Грета Тунберг добитник на „Алтернативната Нобелова награда“

Наградата Right Livelihood, наречена „Алтернативна Нобелова награда“, беше доделена на церемонијата во Стокхолм, а меѓу победниците беше активистката за заштита на климата, Грета Тунберг.

Таа беше наградена за „инспирирање и зајакнување на политичките барања за итна акција за климатските промени, засновано на научни факти“, наведе жирито, кое ја доделува наградата.

Тунберг не можеше да присуствува на настанот, па во видео порака рече: „Борбата продолжува, ние никогаш нема да застанеме“.

Освен неа награди добија и активистката за човекови права од Западна Сахара, Аминату Хаидар, адвокатот Хуо Жимнеи, лидерот на бразилските домородци Дави Копенава и неговата асоцијација Јаномани Хутукара.

Четворицата добитници ќе добијат околу 94.000 евра.

Хаидар повеќе од 30 години се залага за независност на Западна Сахара, територија што Мароко ја окупира од 1975 година. Копенава, член на племето Јаномами, беше награден со организацијата Хутукара Јаномами за заштита на Амазонската прашума. Четвртиот добитник на наградата е кинеската адвокатка Гуо Џианмеј, за нејзината „пионерска и упорна работа“ за правата на жените во Кина. Од 1995 година, таа и нејзините соработници обезбедија бесплатни правни совети на над 120.000 жени.