
Силен земјотрес регистриран во морскиот дел во близина на грчкиот остров Крит
Земјотрес со интензитет од 5.3 до 5.5 степени според првичните информации, беше регистриран на две минути пред полноќ, по локално време, во морскиот дел во близина на грчкиот остров Крит, јави дописничката на МИА од Атина.
Епицентарот на земјотресот бил на 29 километри североисточно од островот со длабочина од 27 километри.
Според Геодинамичкиот институт на грчката национална опсерваторија, земјотресот бил со јачина од 5.3 степени. Земјотресот бил почувствуван во повеќе делови на островот Крит, а половина час по потресот, нема информации за материјална штета или повредени лица.
Епицентарот на потресот е регистриран 75 километри источно од местото Агиос Николаос, односно на 377 километри југоисточно од Атина. Земјотрес со јачина од 6,1 степен според Рихтер, исто така, во непосредна близина на Крит, беше регистриран и на 27 ноември.