Се продалбочува трговската војна меѓу Косово и Србија

Се заострува царинската војна меѓу Косово и Србија. Од денеска на Косово не смее да влезе ниту еден производ од странска компанија, а која има производен погон во Србија, без да плати царина од 100 проценти. Двојно поголема цена ќе се плаќа за Кока Кола, Туборг, Дукат и Гемалто. Приштина објаснува дека пријателите партнери им сугерирале дека сите производи кои пристигнуваат од Србија треба да имаат ист третман.

За новата царинска најава, Белград вели дека е беспредметно да се води дијалог, бидејќи топката сега е во рацете на Брисел и Вашингтон. ЕУ реагираше повторно – дека со загриженост ја следат ситуацијата, и апелираат косвските власти уште еднаш да ја преиспитаат одлуката за проширување на царините и на меѓународните брендови.

За економските познавачи во Белград, новиот потег на Приштина е удар врз европските вредности. Сметаат сепак постојат механизми со кои би можело да се влијае за Косово да ги укине царините.

Тие имаат некаков вид на претпристапна помош која им ја даваат на властите во Приштина, околу 645 милиони или нешто повеќе на шест години, од 2014- 2020-та, а тоа е малку повеќе од 100 милиони евра годишно. Имаат механизми…
Што значи тоа, имаат механизми со кои би можеле да им ги намалат или укинат тие пари?
Така е , да им ги намалат или да укинат некои програми, или да им намалат одредена помош. Тоа би бил механизмот на ЕУ и на некој начин предупредување кое би требало да го добијат, смета Слободан Зечевиќ, од Економски Институт во Белград.

Но, Брисел ја предупредува Приштина само вербално. Проблемот е што не сака да влезе во судир со Америка, која стои зад Косово, поради економското и геостратешкото партнерство што го имаат. Косовските власти остануваат глуви и покрај повиците да го променат ставот, за кој објаснуваат дека е одговор на агресивната кампања која Србија ја води кон Косово.

Алиса Шутиноска