Американските војници во северна Сирија добија наредба да се повлечат од земјата

Околу илјада американски војници распоредени во северниот дел на Сирија добија наредба да се повлечат од земјата, изјави неименуван американски претставник.

Ние ја спроведуваме наредбата. Повлекувањето се однесува на сите војници распоредени во Сирија, освен за оние во базата Ал Танф, која се наоѓа во јужниот дел на земјата и е контролирана од околу 150 американски војници.

Американскиот секретар за одбрана Марк Еспер вчера изјави дека САД ќе повлече илјада војници од северна Сирија, но не појасни дали тоа значи американските војници да заминат од Сирија или само ќе ги напуштат зоните каде се борат турските и курдските сили.

Американскиот претседател Доналд Трамп денеска предупреди дека САД нема да се вклучат во уште една војна помеѓу луѓе кои се борат 200 години едни против други.

Дали луѓето навистина мислат дека треба да влеземе во војна против Турција, која е земја членка на НАТО? Бесконечните војни мора да завршат, истакна Трамп.

Сириската војска денеска влезе во градот Манбиж во северна Сирија, јавуваат сириските државни медиуми.

Претходно денеска, турскиот претседател Реџеп Тајип Ердоган изјави дека турските трупи и сојузниците од сириската опозиција се подготвени да извршат напад врз градот Манбиж, кој беше под контрола на сириските Курди.

Ќе ја спроведеме нашата одлука за Манбиж, рече Ердоган пред новинарите. Во меѓувреме, сириските Курди постигнаа договор со владата во Дамаск за заедничка одбрана против турската инвазија.