Тереза Меј повика на нов договор за безбедност со ЕУ до крајот на 2019 година

Британската премиерка Тереза Меј денеска побара да се склучи нов договор за безбедноста со Европската унија, што ќе стапи во сила следната година, а со цел да се осигура воената, разузнавачката и антитерористичката соработка по излегувањето на Велика Британија од Унијата.

– Клучните аспекти на идното партнерство во оваа област треба да стапат во сила уште од 2019 година, изјави Меј пред европски и американски високи претставници на Минхенската конференција за безбедност.

– Партнерството коe ќе го создадеме, треба да им понуди на Велика Британија и ЕУ начини за комбинирање на нашите напори за што е можно поголема ефикасност во областите од заеднички интерес, додаде таа.

Премиерката исклучи можност за втор референдум за Брегзит и истакна дека не може да се поништи резултатот од гласањето во јуни 2016 година

– Ја напуштаме ЕУ и не може да стане збор за втор референдум или поништување. Сметам дека е важно луѓето во Велика Британија цврсто да веруваат дека штом се донесе одлука, владите не би требало да се откажуваат од неа и да им велат дека погрешиле, истакна Меј.