80 илјади евра за тетовската општинска зграда

5 милиони денари ќе потроши Општина Тетово за реконструкција на општинската зграда. Како што стои во документот на Бирото за јавни набавки, планирано е да се изврши обнова на канцелариите кои ќе се подноват и со нов мебел, замена на подот, дрвените врати, промена на електричната инсталација, изработка на спуштени тавани, реконструкција на санитарни јазли.

Граѓаните велат дека обновата на општинската зграда не е спорна, но во градот има многу поголеми приоритети каде треба да се инвестира во областа на инфраструктурата и комуналиите.

Во Тетово со години наназад не е отворена нова улица, булеварите не се пробини докрај, атмосверската, фекалната канализација, но и водоводната мрежа е дотраена и стара повеќе од половина век, голем дел од улиците и тротоарите се во руинирана состојба, а проблемот со комуналниот смет се уште не е решен.

Од Општина Тетово велат дека поради временските услови работите на терен се со послаб интензитет. Оттаму потенцираа дека моментално се работи на реконструкција на само две улици. Велат дека ќе има проекти во 2019 година, но за какви проекти и колку пари ќе се одвои за нив не дадоа конкретен одговор.

  • И во 2019 година ќе продолжиме со несмалено темпо на работа , а планот и програмата која се уште се обработува по нејзино завршување  ќе ви ја доставиме  комплетно, а и навремено ќе ве известиме кога ќе започне реализацијата, истакнаа од Општина Тетово.

Како што објави Бирото за јавни набавки на својата интернет страна, Општина Тетово од 19 ноември отворила повик за прибирање на понуди за реконструкција на Салата на Советот и канцелариите на општината. Повикот ќе трае до 10 декември по што треба да биде избрана фирма која дала најповолна понуда.

Носителот на набавката е должен да го изврши предметот на договорот во рок од 30 дена од денот на добивање налог за работа. Средствата се обезбедени од општинскиот буџет за 2018 година.

 

Зоран Димовски

 

 

Објавено на
© 2025 Телевизија Телма. Сите права се задржани.
Текстов не смее да се печати или емитува, во целина или во делови, без договор со Телевизија Телма.

СЛИЧНИ ТЕКСТОВИ